Перформансот „Скопје, големото бегство“ е имерсивна претстава и аудио-визуелно искуство, кое ја ангажира публиката низ дел од заборавените места во Скопје, каде што низ колективна прошетка се отвораат прашања за општествената димензија на јавните простори.
Градот и реката се во непрекината, турбулентна дискусија околу која жителите го населуваат ова променливо, понекогаш ирационално, место кое го перципираат како свој дом.
Дали тоа претставува вечна љубовна приказна или приказна за борбата како ова место да се направи прифатливо за живот?

Мисловно-емотивното ткиво на оваа претстава се состои од судир на старото и новото, илузорното, фиктивното и реалното, секојдневното, но и спој на минатите генерации и сеќавања и нова, младешка енергија, која се обидува да најде нови начини за реинтерпретација на градските простори.

Претставата се одвива во форма на интерактивна аудиопрошетка и просторни интервенции низ видеосегменти со елементи на современ танц.
Перформансот е во рамки на проектот “Public Spaces Re:claimed”

НАПОМЕНА:

• Секој посетител потребно е да има телефон со 4Г-мрежа и сопствени слушалки.

• Пред почетокот на перформансот секој посетител ќе добие линк за следење на претставата.

• За евентуалните промени на терминот поради лоши временски услови, ќе бидете навремено известени.